POMPONII MELAE
DE SITU ORBIS

LIBER I.

CAP. XVI. - Caria.

Caria sequitur. [Habitant] incertae originis; (alii indigenas, sunt qui Pelasgos, quidam Cretas existimant) genus usque eo quondam armorum pugnaeque amans, ut aliena etiam bella mercedibus agerent. Hîc castella sunt aliquot: dein promontoria duo, Pedalion et Crya; et, secundum Calbin amnem, Caunus oppidum, valitudine habitantium infame. Inde ad Halicarnasson haec jacent; Rhodiorum aliquot coloniae; portus duo, Gelos, et, cui, ex urbe quam amplectitur, Tisanusa cognomen est; inter eos oppidum Larumna, et Pandion collis in mare emissus: tum tres ex ordine sinus, Thymnias, Schoenus, Bubesius (Thymniae promontorium Aphrodisium est, Schoenus ambit Hylam, Bubesius Acanthum); Cnidus in cornu paene insulae; interque eam et Ceramicum sinum, in recessu posita Euthane. Halicarnassos Argivorum colonia est: et, cur memoranda sit, praeter conditores, Mausoleum efficit, regis Mausoli monimentum, unum de miraculis septem, Artemisiae opus. Trans Halicarnasson illa sunt, litus Leuca, urbes Myndos, Caryanda, Neapolis, sinus Iasius et Basilicus. In Iasio est Bargylos.